इनरुवामा ब्राउन सुगरसहित तीन जना पक्राउ, लागूपदार्थ कारोबार बढ्दो

इनरुवा । सुनसरीको सदरमुकाम इनरुवामा लागूपदार्थ ब्राउन सुगरसहित तीन जना युवा पक्राउ परेका छन् । विशेष सूचनाको आधारमा जिल्ला प्रहरी कार्यालय सुनसरी र अस्थायी प्रहरी पोष्ट बसपार्कबाट खटिएको संयुक्त प्रहरी टोलीले २०८२ साउन १९ गते इनरुवा नगरपालिका–४ स्थित बसपार्क चोकबाट उनीहरूलाई पक्राउ गरेको हो ।
प्रहरीका अनुसार पक्राउ परेकाहरू सखुवागाछी तर्फ पैदल गइरहेका बेला चेकजाँच गर्दा उनीहरूको साथबाट ब्राउन सुगर जस्तो देखिने लागूऔषध फेला परेको हो । पक्राउ परेकामध्ये दुई जना सुनसरी र एक जना धनकुटाका हुन् ।
पक्राउ पर्नेमा धनकुटा जिल्ला साँगुरीगढी गाउँपालिका–६ निवासी २७ वर्षीय सुरेश राई, सुनसरीको रामधुनी नगरपालिका–५ का २५ वर्षीय निरज खड्का र इटहरी उपमहानगरपालिका–१७ निवासी १८ वर्षीय मोहमद मुख्तार रहेका छन् ।
प्रहरीको प्रारम्भिक अनुसन्धान अनुसार सुरेश राईको साथबाट २.७२ ग्राम ब्राउन सुगर जस्तो देखिने पदार्थ बरामद गरिएको छ भने मोहमद मुख्तारको साथबाट १.३९ ग्राम लागूपदार्थ फेला परेको छ । निरज खड्कासँग तत्कालीन अवस्थामा लागूपदार्थ फेला परेको विवरण सार्वजनिक गरिएको छैन, तर अनुसन्धानको दायरामा उनी पनि रहेका छन् ।
पक्राउ परेका तीनै जनालाई आवश्यक कानुनी प्रक्रिया अघि बढाउन जिल्ला प्रहरी कार्यालय सुनसरीमा राखेर थप अनुसन्धान भइरहेको प्रहरीले जनाएको छ ।
यसअघि पनि इनरुवा क्षेत्रमा लगातार लागूपदार्थ सम्बन्धी घटनाहरू घटिरहेका छन् । प्रहरी स्रोतका अनुसार साउन महिनामै मात्रै इनरुवा क्षेत्रमा आधा दर्जनभन्दा बढी लागूपदार्थ कारोबारी पक्राउ परिसकेका छन् । यसले इनरुवा पछिल्लो समय ब्राउन सुगर लगायतका लागूपदार्थ कारोबारको मुख्य थलो बन्दै गएको संकेत दिएको छ ।
सुनसरी प्रहरीले लागूपदार्थ नियन्त्रण अभियानलाई सशक्त रुपमा अघि बढाइरहेको बताउँदै आए पनि इनरुवा लगायतका क्षेत्रमा लागूपदार्थ प्रयोग तथा कारोबार बढ्दै जानु चिन्ताजनक विषय बनेको छ । यसले युवावर्गको भविष्यमा गम्भीर असर पार्ने भएकाले प्रहरी प्रशासनसँगै स्थानीय तह र समाजका सबै पक्षले यसतर्फ गम्भीर ध्यान दिनुपर्ने आवश्यकता देखिएको छ ।
त्यस्तै सुनसरीको कोशी गाउँपालिका–७ स्थित पूर्व–पश्चिम राजमार्गबाट लागू औषध ब्राउन सुगरसहित एक जना युवक पक्राउ परेका छन् । सोमबार गते राति ८ः४५ बजे अस्थायी प्रहरी चौकी हरिपुरबाट खटिएको टोलीले विशेष सूचनाको आधारमा काकडभिट्टाबाट काठमाडौंतर्फ जाँदै गरेको बसमा चेकजाँच गर्ने क्रममा लागू औषधसहित एक जनालाई पक्राउ गरेको हो ।
प्रहरीका अनुसार बा.प्र.०३–००१ ख २९९६ नम्बरको यात्रुबाहक बसलाई रोकेर चेकजाँच गर्दा मोरङ जिल्ला केराबारी गाउँपालिका–८ निवासी २८ वर्षीय बालकुमार पाण्डेको हाफ पेन्टको दाहिने गोजीमा लुकाई छिपाई राखिएको अवस्थामा ब्राउन सुगर जस्तो देखिने ४४.३९ ग्राम लागू औषध फेला परेको थियो ।
पक्राउ परेका पाण्डेलाई तत्काल नियन्त्रणमा लिई थप अनुसन्धानका लागि जिल्ला प्रहरी कार्यालय सुनसरीमा ल्याइएको प्रहरी स्रोतले जानकारी दिएको छ । घटनाबारे थप अनुसन्धान जारी रहेको जनाइएको छ ।