जिल्ला प्रशासन कार्यालयमा निर्वाचन तयारीबारे राजनीतिक दलहरुसँग छलफल

सुनसरी । आगामी निर्वाचनलाई लक्षित गर्दै जिल्ला प्रशासन कार्यालय सुनसरीमा राजनीतिक दलहरुसँग छलफल सम्पन्न भएको छ । निर्वाचनको समग्र वातावरण निर्माण, मतदाताको पहुँच र सहभागितालाई सुनिश्चित गर्न विविध सुझाव र प्रस्तावहरू राखिएका छन् ।
बैठकमा सहभागी दलका प्रतिनिधिहरूले राष्ट्रिय सहमति बिना जेनजीलाई प्रमुखतामा राखी चुनाव गर्नु देशका लागि दुर्भाग्यपूर्ण कदम हुने बताएका छन् । उनीहरूले राजनीतिक सहमति र आपसी विश्वासका आधारमा मात्रै निर्वाचनको मिति र प्रक्रिया अघि बढाउनुपर्नेमा जोड दिए ।
त्यस्तै बैठकमा बिदेशमा रहेका नेपाली श्रमिक (अन्नदाता) हरूलाई निर्वाचनमा अनिवार्य रूपमा सहभागी गराउने व्यवस्था गर्नुपर्ने माग पनि गरिएको छ । प्रविधिको युगमा पोष्टल वा अनलाइन भोटिङ प्रणाली अब मूलभूत आवश्यकता भएको सहभागीहरूको भनाइ थियो ।
निर्वाचन क्षेत्रका भौगोलिक कठिनाइका विषयमा पनि छलफल भएको थियो । सुनसरीको गढी–६ मा एउटा बुथबाट अर्को बुथसम्म लामो दूरी रहेको र त्यसको सहजीकरणका लागि निर्वाचन आयोगलाई ध्यानाकर्षण गराइएको छ । साथै, बराहक्षेत्र–६ र ९ मा पर्ने श्रीलंका टापु (गोरैया) का बासिन्दा विगतदेखि नै मतदानबाट वञ्चित हुँदै आएका भन्दै सो स्थानमै स्थायी मतदान केन्द्र स्थापना गर्न आग्रह गरिएको छ ।
सुनसरीमा अगामि प्रतिनिधि सभा निर्वाचनका लागि थप पाँच स्थानमा मतदान केन्द्र आवश्यक रहेको सरोकारबालाले जोड दिएका थिए ।
जिल्ला निर्वाचन कार्यालय सुनसरीको आयोजनामा भएको मतदान स्थल तथा मतदान निर्धारण विषयक अन्तरक्रिया कार्यक्रममा सरोकारबालाहरुले थप पाँच स्थानमा मतदान केन्द्र थप्नु गर्नुपर्ने सुझाव दिएका हुन । जिल्ला निर्वाचन कार्यालयलाई सात हजार बढी मतदाता रहेको धरानको २ वटा वडा, इटहरीको दुई वटा वडा र बराहक्षेत्र नगरपालिकाको श्रीलंका टाप्पुमा एउटा गरि पाँच वडामा गरि पाँच स्थानमा मतदान केन्द्र आवश्यक रहेको सुझाव दिएको नेपाली कांग्रेसका सभापति केदार भण्डारीले जानकारी दिए ।
कार्यक्रममा सरोकारबालाहरु सहितको उपस्थितीमा मतदान स्थल तथा मतदान केन्द्र निर्धारण कार्यविधि २०८१ को दफाः १० (क) बमोजिम मतदान स्थल मतादान केन्द्र तोक्ने कार्यको संयोजन र समन्वय गर्न जिल्ला निर्वाचन कार्यालयका प्रमुख जिल्ला निर्वाचन अधिकारी कृष्ण प्रसाद पौडेलको संयोजकत्वमा जिल्ला स्थित सुरक्षा निकायका सबै प्रतिनिधिहरु र सम्बन्धित वडा सचिव समेत रहने गरी उपसमिति बनाउने निणर्य गरेको छ ।
समितिले थप गर्नुपर्ने मतदान स्थलको स्थलगत अनुगमन गरी प्रतिवेदन पेश गर्ने निर्णय गरेको प्रमुख जिल्ला अधिकारी धमेन्द्र कुमार मिश्रले जानकारी दिए । सुनसरीमा हाल १६६ स्थानमा मतदान केन्द्र रहेको छ ।
यसैगरी, मतदाता नामावली अद्यावधिकका क्रममा नागरिकले पालिकामै गएर नयाँ नाम दर्ता गर्न सक्ने व्यवस्था गर्न पनि सुझाव दिइएको छ ।
बैठकमा नेपाली कांग्रेसका जिल्ला सभापति केदार भण्डारी सहित प्रमुख जिल्ला अधिकारी, सुरक्षा निकायका प्रमुखहरु, विभिन्न दलका जिल्ला तथा नगर तहका नेताहरूको सहभागिता रहेको थियो । तर नेकपा (एमाले) का प्रतिनिधिहरू बैठकमा उपस्थित रहेका थिएनन् ।
एमालेका जिल्ला सचिव राम कोइराला ले पार्टी कार्यव्यस्तताको कारण बैठकमा सहभागी हुन नसकेको बताए । उनले भने, “जानकारी आएको थियो, हामी जान पनि तयार थियौँ तर कार्य व्यस्तताले जान सकेनौँ । नेकपा एमाले चुनावबाट पछि हट्दैन, तर निर्वाचनको वातावरण बन्नु अत्यावश्यक छ ।”
बैठकले निर्वाचन आयोग र सम्बन्धित निकायहरूलाई आवश्यक समन्वय र तयारी तीव्र बनाउन आग्रह गरेको छ ।