सुरक्षा निकायले प्रयोग गर्ने वाकिटकी, कार्ड र पोसाकसहित इनरुवाका एक जना पक्राउ

इनरुवा । सुनसरी जिल्लाको कोशी गाउँपालिका वडा नं. १ भन्सार रोड क्षेत्रमा शंकास्पद गतिविधिमा संलग्न रहेको आशंकामा एक व्यक्तिलाई नेपाल प्रहरीले नियन्त्रणमा लिएको छ । पक्राउ परेका व्यक्ति इनरुवा नगरपालिका वडा नं. ८ कन्समडान निवासी ३५ वर्षीय जाबिर हुसेन मियाँ रहेको जिल्ला प्रहरी कार्यालय सुनसरीले जनाएको छ ।
इलाका प्रहरी कार्यालय लौकहीबाट खटिएको प्रहरी टोलीले मियाँलाई प्रदेश १–०२–०४७ प १५४९ नम्बरको मोटरसाइकलमा नेपालबाट भारततर्फ जाँदै गरेको अवस्थामा बिहीबार १२ः३० बजे रोकेर चेकजाँच गरेको थियो । जाँचका क्रममा मियाँको साथबाट नेपाल प्रहरी जवान फिदा हुसेनको नाममा रहेको परिचयपत्र, मोहमद सहमद मियाँको नाममा रहेको मतदाता परिचयपत्र र बाओवफेङ ब्रान्डको सुरक्षा निकायले प्रयोग गर्ने किसिमको हेण्डसेट फेला परेको प्रहरी स्रोतले जनाएको छ ।
प्रहरीका अनुसार उक्त व्यक्ति शंकास्पद तरिकाले सीमावर्ती क्षेत्रमा प्रवेश गरिरहेको सूचना पाएपछि निगरानी गरिएको थियो । प्रारम्भिक अनुसन्धानमा ती परिचयपत्र र हेण्डसेटको शुद्धता तथा प्रयोगको उद्देश्यबारे थप अनुसन्धान भइरहेको छ । मियाँलाई नियन्त्रणमा लिएर जिल्ला प्रहरी कार्यालय सुनसरीमा ल्याइएको र आवश्यक अनुसन्धान प्रक्रिया अगाडि बढाइएको प्रहरी स्रोतले जानकारी दिएको छ ।
सुरक्षा संवेदनशीलता र सीमावर्ती क्षेत्रमा हुनसक्ने आपराधिक क्रियाकलापलाई ध्यानमा राख्दै प्रहरीले यस्ता गतिविधिमा निगरानी बढाएको बताइएको छ । घटनासम्बन्धी थप विवरणहरू सार्वजनिक अनुसन्धान पश्चात् मात्र खुल्ने प्रहरीले जनाएको छ ।