कोशी गाउँपालिकाको केन्द्र सार्न प्रदेश सरकारद्वारा संघीय सरकारलाई सिफारिस

इनरुवा । सुनसरी जिल्लाको कोशी गाउँपालिकाको प्रशासनिक केन्द्र हाल रहेको लौकही बजार क्षेत्रबाट सार्न कोशी प्रदेश सरकारले संघीय सरकार समक्ष सिफारिस गरेको छ ।

बुधवार बसेको कोशी प्रदेश सरकार मन्त्री परिषदको बैठकले कोशी गाउँपालिकाको केन्द्र सार्न सफारिस गरेको हो । कोशी गाउँपालिकाको सिफारिसका आधारमा प्रदेश सरकारले केन्द्र सार्न संघीय सरकार समक्ष सिफारिस गर्ने निर्णय गरेको कोशी सरकारका प्रवक्ता समेत रहेका आन्तरिक मामिला मन्त्री रेवती रमण भण्डारीले जानकारी दिए ।

कोशी गाउँपालिकाको सबैभन्दा ठूलो बजार लौकही बजारमा पालिका विगत आठ वर्षदेखि भाडाको घरमा सञ्चालन भइरहेको छ । गाउँपालिकाले लौकही बजारभन्दा पश्चिमतर्फ करिब पौने एक किलोमिटर पर निःशुल्क जग्गा प्राप्त गर्ने अवसर पाएपछि पालिकाको केन्द्र सार्ने प्रक्रिया अघि बढाएको हो ।

जग्गा दाताहरुको प्रतिबद्धता आएपछि कोशी गाउँपालिकाले पालिकाको केन्द्र सार्न प्रदेश सरकारसँग आग्रह गरेकोमा प्रदेश सरकारको मन्त्रिपरिषद्को बुधबार बसेको बैठकले पालिकाको केन्द्र बद्रिपुरमा सार्न संघीय सरकारलाई सिफारिस गर्ने निर्णय गरेको हो ।

गाउँपालिका अध्यक्ष ऐयूब अन्सारीले जानकारी दिएअनुसार अहिलेको केन्द्र लौकही बजारभन्दा पश्चिममा अवस्थित बद्रिपुरमा पालिकाको नयाँ केन्द्र स्थापना गर्न लागिएको हो । उनले भने, ‘बद्रिपुरमा स्थानीयवासी अजिम मन्सुरी र उमेश साहले पालिकाको भवन निर्माणका लागि १० कट्ठा जग्गा निःशुल्क उपलब्ध गराउने प्रस्ताव गरेका छन् । सोही आधारमा हामीले प्रदेश सरकारलाई आग्रह गरेका हौ ।’

पालिकाको सिफारिस गरिएको नयाँ केन्द्र लौकही बजार भन्दा करिब पौने किलोमिटर पश्चिम राजा पोखरी र पशुपंक्षीको दाना उत्पादन गर्ने नेपालकै सबैभन्दा ठूलो उद्योगको बिच भागको पूर्व–पश्चिम राजमार्गबाट करिब एक सय मिटर उत्तरतर्फ अवस्थित रहेको छ ।

पालिकाले लामो समयदेखि भाडाको घरमा सञ्चालन भइरहेकाले आफ्नै भवन निर्माण गरी सेवा प्रवाहलाई प्रभावकारी बनाउने लक्ष्य राखेको अध्यक्ष अन्सारीले बताए ।

निःशुल्क जग्गाको प्रस्ताव र स्थानको सुगमता हेर्दा यो निर्णयले गाउँपालिकाको प्रशासनिक कार्यमा सहजता ल्याउन सक्ने अपेक्षासहित निर्णय गरेका हौ, उनले भने, ‘ जग्गा प्राप्त भएपछि त्यहाँ पालिकाको केन्द्र सञ्चालन गर्ने गरी भवन निर्माणको काम सुरु गर्ने योजनामा हामी छौ ।’

यद्यपि, यो सिफारिसलाई संघीय सरकारले स्वीकृत गरेपछि मात्रै पालिकाको केन्द्र सराईको प्रक्रिया अन्तिम रूप लिनेछ ।

कोशी गाउँपालिकाको लौकही क्षेत्र पालिकाको पूर्वतर्फको सिमाना भएको र त्यसभन्दा पश्चिम पालिकाको ठूलो बस्ती र क्षेत्र रहेकोले सबैलाई सुगम हुने गरी पालिकाको नयाँ केन्द्र बनाउन लागिएको अन्सारीले दावी गरे ।

यद्यपि यस विषयलाई लिएर स्थानीयबासिन्दाहरुको भने मिश्रित प्रतिक्रिया रहेको देखिन्छ । केही अधिकांश भुगोल पश्चिमतर्फ रहेकोले केन्द्र लौकही उपयूक्त नभएको जिकिर गर्दै नयाँ बन्ने केन्द्रपनि सुगम भने नहुने धारण राख्छन भने केही लौकही बजार पालिका बासीहरुको मुख्य बजार रहेकोले बजार आउँदा नै पालिकाको काम हुने अवस्थाबाट अब पालिकाको काम गर्न र बजार आउन नागरिकहरुले अलग अलग समयको ब्यवस्थापन गर्नु पर्ने बाध्यता आइपरेको दावी गरेका छन । अर्का थरी भने अहिले बन्न लागेको केन्द्र पालिका अध्यक्ष अन्सारीको घर नजिक र उनले बनाएको नयाँ भवनको समेत नजिक रहेकोले आफ्नो ब्यक्तिगत फाइदाको हिसावले केन्द्र सार्न लागेको आरोप लगाएका छन ।