सुनसरी । सुनसरी जिल्लाको हरिनगरा गाउँपालिका वडा नं. ५ र ६ को सिमानामा अवस्थित कटान खोलाको बगरमा बालुवाले पुरी लुकाइएको अवस्थामा ठूलो परिमाणमा लागू औषध गाँजा बरामद गरिएको छ।
प्राप्त गोप्य सूचनाका आधारमा २०८२ जेठ २० गते दिउँसो करिब ५ बजे प्रहरी चौकी घुस्कीले सुराकी पाएको जानकारीसँगै तत्कालै इलाका प्रहरी कार्यालय देवानगंज, प्रहरी चौकी घुस्की, सुरक्षा बेस बसन्तपुर र जिल्ला प्रहरी कार्यालय सुनसरीबाट खटिएको संयुक्त टोली घटनास्थलमा परिचालित गरिएको थियो।
इलाका प्रहरी कार्यालय देवानगंजबाट प्रहरी निरीक्षक कमल बिष्टको नेतृत्वमा ७ जना, प्रहरी चौकी घुस्कीबाट प्रहरी नायब निरीक्षक सुरेश यादवको नेतृत्वमा ४ जना, सुरक्षा बेस बसन्तपुरबाट प्रहरी नायब निरीक्षक विष्णु बहादुर दनुवारको नेतृत्वमा ३ जना, र जिल्ला प्रहरी कार्यालय सुनसरीबाट प्रहरी नायब निरीक्षक महेश ढकालको नेतृत्वमा ६ जना गरी कुल २० जना नेपाल प्रहरी खटाइएको थियो।
त्यस्तै, शसस्त्र प्रहरी बल नेपाल द्यइए घुस्कीबाट सशस्त्र प्रहरी निरीक्षक नरेन्द्र घिमिरे र द्यइए बसन्तपुरबाट सशस्त्र प्रहरी निरीक्षक इन्द्रजंग थापाको नेतृत्वमा २० जना सशस्त्र प्रहरी समेत परिचालन गरिएको थियो।
संयुक्त रूपमा गरिएको खोजतलासका क्रममा खोलाको किनारमा बालुवाले छोपिएको अवस्थामा विभिन्न रंगका प्लास्टिकका बोरामा प्याक गरी लुकाइएको ११२० केजी (एक हजार एक सय बीस किलोग्राम) लागू औषध गाँजा जस्तो देखिने पदार्थ फेला पारिएको प्रहरीले जनाएको छ।
बरामद गरिएको गाँजालाई आवश्यक कानुनी प्रक्रिया पूरा गरी जिल्ला प्रहरी कार्यालय सुनसरी ल्याइएको छ। हाल घटनाबारे थप अनुसन्धान भइरहेको छ।
Discussion about this post