वैदेशिक रोजगार ठगी नियन्त्रणमा सुनसरीको नयाँ कदम

इनरुवा । वैदेशिक रोजगारीका लागि जाने नेपालीहरुको संख्याका आधारमा सुनसरी जिल्ला देशभरिमा नवौं तथा कोशी प्रदेशमा तेस्रो स्थानमा पर्दछ । रोजगारीको खोजीमा विदेशिनेको संख्या बढेसँगै ठगीमा पर्ने जोखिमसमेत बढिरहेको छ । यही संवेदनशीलतालाई मध्यनजर गर्दै सुनसरी जिल्ला प्रशासन कार्यालयमा वैदेशिक रोजगार ठगी नियन्त्रण शाखा संचालन गरिएको छ ।
उक्त शाखा यस आर्थिक वर्षको चैत्र महिनादेखि औपचारिक रूपमा संचालनमा आएको हो । शाखाको सञ्चालनमा सेफर माइग्रेसन (सामी परियोजना) ले प्रत्यक्ष सहयोग गर्दै आएको छ, जसअन्तर्गत श्रोत केन्द्रका परामर्शकर्तामार्फत पीडितलाई आवश्यक सहयोग प्रदान गरिँदै आएको छ ।
शाखाका प्रमुख भगवान दाहालका अनुसार हालसम्म शाखामा कुल ९९६ वटा ठगी सम्बन्धी मुद्दा दर्ता भइसकेका छन् । तीमध्ये ७५ वटा मुद्दामा मेलमिलाप प्रक्रियाबाट समाधान गरिनुका साथै ठगिएका पीडितलाई पैसा फिर्ता गराउने कार्यसमेत सम्पन्न भएको छ ।
शाखाको स्थापना पछि पीडितहरुले सहज रूपमा उजुरी दर्ता गर्न पाएका छन् भने सुसूचित परामर्श तथा कानुनी सहायताले ठगीको जोखिम न्यूनीकरणमा सहयोग पुगेको देखिन्छ ।
वैदेशिक रोजगारमा जान चाहने व्यक्तिहरुलाई सुरक्षित र जानकारीमूलक निर्णय लिन सघाउने उद्देश्यले शाखाले सचेतनामूलक कार्यक्रमहरू पनि सञ्चालन गर्दै आएको छ ।
शाखाका अनुसार भविष्यमा थप स्रोत साधन, दक्ष जनशक्ति तथा प्रविधिको सहायताले पीडितमैत्री सेवा प्रवाह अझ प्रभावकारी बनाइने लक्ष्य रहेको छ।
सुनसरी जिल्लामा सामी परियोजनाले पनि केही पालिकाहरुमार्फत बैदेशिक रोजगारीमा जानेहरुका लागि प्राविधिक तालिम, प्रतिबद्धताअनुसारको रोजगारी नपाएको अवस्थामा उनीहरुको रोजगारीको सुनिश्चितता, ठगिएकोमा कारवाही र असुली, मृत्यूपश्चात शब फिर्ता र क्षतिपूर्ति लगायतको विषयमा काम गरिरहेको छ । सामी परियोजनाले विदेशबाट आउने पैसाको ब्यवस्थापनसहित बैदेशिक रोजगारमा गएकाको परिवारमा देखिएको मानसिक समस्या जस्ता विषयमा पनि काम गरिरहेको छ ।
इनरुवा नगरपालिकामा सामी परियोजनाका कार्यक्रम अधिकृत धिरज भट्टराई सामी परियोजनाले बैदेशिक रोजगारमा जानेहरुको समस्या समाधानको लागि गाउँगाउँमा कार्यकर्ताहरु परिचालन गरेर काम गरिरहेको जानकारी दिदै परियोजनाकै उपलब्धीको रुपमा धेरै सुनसरीबासीले बैदेशिक रोजगारीको क्रममा उत्पन्न हुने धेरै समस्याबाट राहत पाएको दावी गरे ।
अझै जिल्ला प्रशासन कार्यालयमा नै यस्तो शाखा बनाएर काम थाल्दा त्यसले अझै बैदेशिक रोजगारीको क्रममा उत्पन्न हुने समस्या समाधानमा सहयोग गरेको बताए ।