सशस्त्र प्रहरीको गोली लागेर मृत्यु भएका विजय साह प्रकरणमा छानबिन समिति गठन

इनरुवा । सुनसरीको कोशी गाउापालिका वडा नम्बर १ लौकहीको नेपाल भारत सीमा नजिक सशस्त्र प्रहरी बलको गोली लागेर मृत्यु भएका विजय साहको घटनाबारे सत्य तथ्य पत्ता लगाउन सात सदस्यीय छानबिन समिति गठन गरिने भएको छ । मृतक साहको मृत्यु र गोली प्रहार हुनुका कारण तथा त्यसबाट उत्पन्न परिस्थितिबारे गहन छानबिन गरी प्रतिवेदन पेश गर्न प्रमुख जिल्ला अधिकारीको संयोजकत्वमा समिति गठन गर्ने सहमति भएको हो ।
सहमति अनुसार छानबिन समितिमा नेपाल प्रहरीको प्रदेश कार्यालय तथा राष्ट्रिय अनुसन्धान विभागका अधिकृत प्रतिनिधि रहनेछन् । समितिले गठन भएको मितिले सात दिनभित्र मिश्रित प्रतिवेदन पेश गर्ने जनाइएको छ ।
छानबिन समितिको प्रतिवेदन प्राप्त भएपछि सुरक्षाकर्मीको लापरबाहीका कारण मृत्यु भएको पुष्टि भएमा नियमानुसार राहत तथा क्षतिपूर्तिका लागि गृह मन्त्रालयमा सिफारिस गरी पठाइने सहमति भएको छ ।
त्यसैगरी मृतक विजय साहकी श्रीमतीलाई रोजगारी उपलब्ध गराउन प्रमुख जिल्ला अधिकारीले पहल गर्ने र आवश्यक सहजीकरण गर्ने सहमति पनि भएको छ । साथै मृतकका छोराले सशस्त्र प्रहरी बलमा भर्ना हुने इच्छा व्यक्त गरेमा सशस्त्र प्रहरी बल नम्बर १ बराह बाहिनीले नियमानुसार आवश्यक सहयोग र सहजीकरण गर्ने उल्लेख गरिएको छ ।
सहमति अनुसार मृतक विजय साहको शव पोस्टमार्टमका लागि नेपाल प्रहरीलाई हस्तान्तरण गरिनेछ । पोस्टमार्टम पश्चात मृतक परिवारले दाहसंस्कार गर्ने व्यवस्था मिलाइनेछ ।
घटनापछि स्थानीय स्तरमा उत्पन्न तनावलाई मध्यनजर गर्दै सरोकारवाला निकायबीच भएको सहमतिले मृतक परिवारलाई न्याय दिलाउने र घटनाको यथार्थ सार्वजनिक हुने अपेक्षा गरिएको छ ।
प्रमुख जिल्ला अधिकारी बाशुदेव घिमिरेको अध्यक्षमा भएको सर्वपक्षीय छलफलमा संविधान सभा सदस्य सविता यादव, प्रजिअ घिमिरेसहित ससशस्त्र प्रहरी नायब महानिरीक्षक कुमार न्यौपाने, सहायक प्रमुख जिल्ला अधिकारी नरेन्द्र परियार, जिल्ला प्रहरी कार्याल्य सुनसरीका प्रहरी उपरिक्षक केशबकुमार थेवे, सशस्त्र प्रहरी बल नेपाल नम्बर ४ हेडक्वार्टर सुनसरीका सशस्त्र प्रहरी उपरिक्षक निर्मलकुमार थापा, सशस्त्र प्रहरी बल नेपाल नम्बर ३७ रिजर्भ गण सुनसरीका सशस्त्र प्रहरी उपरिक्षक किसन कर्माचार्य, शसस्त्र प्रहरी बल नेपाल नम्बर १ बाहिनी, पकलीका सशस्त्र प्रहरी नायब उपरिक्षक बालकृष्ण महार्जन, राष्ट्रिय अनुसन्धान जिल्ला कार्यालय सुनसरीका उप अनुसन्धान निरीक्षक विमल घिमिरे, सेनानी सन्तोष विक्रम थापा, अनुसन्धान अधिकृत सविना खनाल, कोशी गाउँपालिका उपाध्यक्ष अनितादेबी यादव, कृषि शाखा प्रमुख सोनुकुमार यादव, कोशी वडा नम्बर २ का प्रतिनिधि रोहितकुमार यादव, उद्योग बाणिज्य संघ इनरुवाका अध्यक्ष विरेन्द्रकुमार साह, भोक्राहा नरसिंहका पूर्व वडाध्यक्ष राजेश्वर प्रसाद साहसहित झण्डै दुई दर्जन स्थानीय सरोकारवालाहरुको उपस्थिति रहेको थियो ।