डीआईजी घिमिरेद्वारा कडाइका साथ सेवा प्रवाह गर्न सुनसरी प्रहरीलाई निर्देशन

इनरुवा । कोशी प्रदेश प्रहरी कार्यालय, विराटनगरका कार्यालय प्रमुख प्रहरी नायव महानिरीक्षक (डीआईजी) बिनोद घिमिरे नेतृत्वको निरीक्षण टोलीले बुधवार जिल्ला प्रहरी कार्यालय सुनसरीको अवलोकन र निरीक्षणसहित सेवा प्रवाहलाई चुस्त दुरुस्त बनाउन निर्देशन दिएका छन ।
डीआईजी घिमिरेसहितको टोलीले कार्यालयको भौतिक संरचना, नागरिक सहायता कक्षदेखि विभिन्न शाखाहरूको काम–कारबाही, सेवा प्रवाह तथा सवल पक्षहरूबारे विस्तृत जानकारी लिएर निरीक्षण गरेको थियो ।
निरीक्षणपछि डीआईजी घिमिरेले मातहतका सबै इन्चार्ज तथा कार्यaxरत प्रहरीलाई कानून कार्यान्वयनमा कठोर, व्यावसायिक र जिम्मेवारीपूर्वक खटिन निर्देशन दिए ।
उनले अपराध अनुसन्धान तथा अभियोजन, लागू औषध नियन्त्रण, भन्सार चोरी–निकासी नियन्त्रण जस्ता संवेदनशील क्षेत्रमा प्रहरी कर्मचारीहरूले निर्ममतापूर्वक र कुनै प्रकारको थकान नमानि काम गर्नुपर्ने बताउँदै जनताको सुरक्षामा कुनै कमी हुन नदिन आह्वान गरे ।
डीआईजी घिमिरेले प्रहरीको पोशाक आफैंमा व्यक्तित्व र क्षमताको पहिचान भएको उल्लेख गर्दै “समयपालन, शिष्टता र सभ्य व्यवहार” को साथ सेवा प्रवाह गर्न निर्देशन दिए ।
आर्थिक प्रलोभनप्रति शून्य सहनशीलता अपनाउन पनि उनले जोड दिए ।
घिमिरेले प्रहरी आचरणमा शुद्धता, संगठन प्रतिको निष्ठा र टिमवर्कलाई प्राथमिकता दिन आग्रह गर्दै धार्मिक तथा संवेदनशील गतिविधिहरूलाई समयमै मूल्यांकन गरी सम्भावित घटनालाई न्यूनिकरण गर्न सहिष्णुता अपनाउन निर्देशन दिए ।
सँगै उनले ट्राफिक प्रहरीलेसँग संयुक्त चेकिङ, चेतनामूलक कार्यक्रममार्फत घटनाहरू न्यूनिकरण, उपलब्ध जनशक्ति तथा स्रोतसाधनको उच्चतम प्रयोग र अन्य निकायसँग समन्वय तथा सहकार्य बढाउन उनले आवश्यक कार्ययोजना बनाउन सुझाव दिए ।
त्यसैगरी निरीक्षणको निष्कर्ष प्रस्तुत गर्दै डीआईजी घिमिरेले प्रहरी संगठनको छवि सुधार्न आचारसंहिताको अक्षरशः पालना अनिवार्य रहेको बताए ।
कार्यक्रममा सुनसरी प्रहरी प्रमुख एसपी केशबकुमार थेवे, डिएसपी, इलाका इन्चार्जसहित उच्च अधिकृतदेखि विभिन्न शाखाका प्रहरी कर्मचारीहरूको उपस्थिति थियो ।