इनरुवा ६ का वडाध्यक्षविरुद्ध फौजदारी अभियोगमा मुद्दा दर्ता

इनरुवा । इनरुवा नगरपालिकाको वडा नम्बर ६ का वडाध्यक्ष सुमन थापा विरुद्ध अंगभंगको फौजदारी अभियोगमा मुद्दा दर्ता भई पक्राउ पुर्जी जारी भएको छ । तर, निलम्बनको मितिपछि पनि उहाँले वडाध्यक्षकै हैसियतमा काम गरेको तथ्य सार्वजनिक भएको छ ।
२०८१ साल फागुण २२ गते साँझ चतराबाट कान्छीचोक तर्फ आउँदै गर्दा थापाले चलाएको बा २१ च ६८८८ नम्बरको निशान कारले प्र.१–०२–०४४प ७४२८ नम्बरको मोटरसाइकललाई ठक्कर दिँदा पछाडि बस्नु भएकी देविका खनाल गम्भीर घाइते हुन भएको थियो । प्रारम्भिक उपचार विराट नर्सिङ होममा भएपछि उहाँलाई बीपी कोइराला स्वास्थ्य विज्ञान प्रतिष्ठानको अति संवेदनशील कक्षमा भर्ना गरिएको छ । छ महिनादेखि उहाँको अवस्था गम्भीर नै छ र घाउमा सुधार आएको छैन ।
दुर्घटना लगत्तै पीडित पक्षले प्रहरीमा जाहेरी दर्ता गर्न खोज्दा अस्वीकार गरिएको थियो । पीडित पक्षले पटक पटक विभिन्न निकायमार्फत जाहेरी दर्ता गर्ने प्रयास गरेपनि प्रहरीले नमान्दा दर्ता हुन नसकेर पीडितहरु थप पीडामा लामो समयसम्म रहेका थिए ।
अन्तिममा पीडितहरुले हुलाकमार्फत पठाइएको जाहेरी पनि लामो समयसम्म दर्ता नगरी प्रहरीले थन्काएको थियो । त्यसपछि पीडित पक्षले उच्च अदालतमा निवेदन दिनु परेको हो । अदालतले भदौ ३ गते जिल्ला सरकारी वकिल कार्यालयलाई कारणसहित जवाफ दिन आदेश दिएपछि प्रहरी सक्रिय भएको हो ।
जिल्ला प्रहरी कार्यालय सुनसरीका प्रहरी उपरीक्षक सुमन कुमार तिम्सिनाका अनुसार साउन १६ गते मुद्दा दर्ता भई साउन २० गते पक्राउ पुर्जी जारी भएको छ । उहाँले आफूहरुले सुमन थापाविरुद्धको मुद्दामा उनको पहिचानको लागि प्रशासनलाई पत्र पठाएको जानकारी दिदै कानूनअनुसार पक्राउ पुर्जी जारी भएको ब्यक्ति सुमन थापा वडाध्यक्ष हुन कि होइन भन्ने विषयमा अनभिज्ञ रहेको बताउनुभयो । यद्यपि उहाँले सार्वजनिक पद धारण गरेको ब्यक्ति भए मुद्दा दर्ता भएको अवस्थामा स्वतह पद निलम्बन हुने बताउनुभयो ।
पीडितको तर्फबाट उच्च अदालत विराटनगरमा भएको रिट निवेदन सुनवाईमा सहभागि भएका अधिवक्ता बसन्त सुवेदीले अदालतको आदेशपछि मात्रै प्रहरीले जाहेरी दर्ता गर्न सक्रियता देखाउनुले प्रहरी यो विषयमा संवेदनशिल नदेखिएको दावी गर्नु भयो ।
उहाँले उच्च अदालतको आदेशपछि प्रहरीले उच्च अदालतलाई जाहेरी दर्ता भएको र सोहीअनुसार मुद्दा समेत दर्ता भई पक्राउ पुर्जी जारी गरेको जवाफ दिएको थियो ।
उहाँले सवारी अंगभंगको मुद्दा फौजदारी मुद्दा भएकोले सो मुद्दा परेपछि सार्वजनिक पद धारण गरेको ब्यक्ति कानूनअनुसार स्वतह निलम्बन हुने ब्यवस्था रहेको जानकारी दिनु भयो ।
कानुनअनुसार सार्वजनिक पद धारण गरेको व्यक्तिमाथि फौजदारी अभियोगमा मुद्दा दर्ता भई पक्राउ पुर्जी जारी भएलगत्तै पद स्वतः निलम्बन हुने भएपनि वडाध्यक्ष थापाले भदौको पहिलो सातासम्म वडाध्यक्षकै हैसियतमा कार्यालय सञ्चालन गरेको वडा कार्यालय स्रोतले जनाएको छ । त्यसपछि मात्र उहाँले वडा सदस्य कृष्ण श्रेष्ठलाई कार्यवाहक जिम्मेवारी दिएर उपचारका लागि काठमाडौँ गएको जानकारी नगरपालिकाले दिएको छ । थापाले भदौ ८ गते सदस्य श्रेष्ठलाई कार्यवाहक दिएका थिए ।
इनरुवा नगरपालिकाका प्रमुख प्रशासकीय अधिकृत डिल्लीराज निरौलाले मुद्दा दर्ता र निलम्बनबारे कुनै निकायबाट औपचारिक जानकारी नआएको बताउनुभयो । उहाँले औपचारिक रुपमा पत्र आएपछि सोहीअनुसार कानूनी प्रक्रिया अगाडि बढाउने जानकारी दिनुभयो । उहाँले वडाध्यक्ष आइतवारमात्रै कार्यवाहक दिएर गएको जानकारी दिदै यति मुद्दा दर्ता भएर पद निलम्बन भएको भए निलम्बनको मितिदेखिका यता उनले गरेको सबै काम बदर हुने बताउनुभयो ।
नगर प्रमुख केदार भण्डारीले अहिलेसम्म वडाध्यक्ष थापाविरुद्ध फौजदारी अभियोगमा अदालतमा मुद्दा दर्ता भई पक्राउ पुर्जी जारी भएको विषयमा आफूलाई कुनै औपचारिक जानकारी नभएको उल्लेख गर्दै औपचारिक पत्र आएपछि मात्र कानुनअनुसार कारबाही अघि बढाइने प्रतिक्रिया दिएका छन् ।
कानुनले प्रहरीलाई मुद्दा दर्ता भएलगत्तै सम्बन्धित निकायलाई जानकारी गराउने र पक्राउ सुनिश्चित गर्ने जिम्मेवारी दिएको छ । तर, जिल्ला प्रहरी कार्यालय भन्दा तीन किलोमिटरको दुरीमा रहेको वडा कार्यालयमा वडाध्यक्ष थापा भदौ ८ गते आइतवारसम्म कार्यरत रहँदासमेत पक्राउ नगरेको घटना र जाहेरी दर्तामा गरेको ढिलाई लगायतको कारण प्रहरीको नियतमा गंभिर आशंका उत्पन्न भएको पीडितहरु बताउँछन तर प्रहरी स्रोत भने घटनामा उच्च राजनीतिक दवावका कारण घटना सक्रियाता देखाउन नसकेको बाध्यता पोख्दछ ।